英格兰中场基亚利殊对伊朗一战入波，协助英格兰以6比2大胜，呢位曼城球星入波後跳起「虫虫舞」，献畀患有脑瘫嘅11岁小球迷芬尼（Finlay Fisher）。估唔到翌日，基亚利殊仲专登打视像电话畀芬尼，氹得对方相当开心！

芬尼着住基亚利殊送畀佢嘅曼城签名波衫，大赞偶像：「我锺意你球入波呀！」基亚利殊笑住回答：「你应该锺意我嘅庆祝动作多啲？依家你出晒名喇！有冇谂过我会为你做呢个动作？」芬尼直言：「我以为你唔记得。」其後两人互相问候，基亚利殊就话卡塔尔虽然热，但适应得不错，笑言：「我应该摆你落行李带埋你嚟！」

其实芬尼几乎错过呢场精彩比赛，事关佢周一因脚伤入院，去到开赛前10分钟先赶到返屋企睇波。後备上阵嘅基亚利殊最终为英格兰「埋斋」，呢个亦系佢首个国际大赛入球。「我一落场忙住搵入球机会，想为你庆祝一次，呢个承诺一直喺我脑海之中。」