巴西球星尼马插水碌地形象深入民心，呢位前锋除咗演技一流之外，其实射术亦属於顶级，佢已经累积为「森巴兵团」入75球，仅比巴西国家队史上入波最多嘅球王比利少2球，相信踢完今届世界盃後，尼马应该可以成为森巴射手王。

尼马近年负面新闻多多，更一度面临被所效力球会巴黎圣日耳门(PSG)踢走，庆幸呢位30岁射手洗心革面专心踢波，表现有大改善，今季为PSG上阵20场入15球，脚风非常顺，所以要喺今届世界盃入多3球，超越球王比利嘅国家队入波纪录，机会非常大。

除咗挑战比利嘅森巴入球王地位之外，尼马今届只要入1球，就可以成为巴西史上第3位曾於3届世界盃决赛周入波嘅球员，另外2位系比利同「大哨」朗拿度。可见数据上尼马已经属於巴西殿堂级名将，并非「碌地王」咁简单。