日本大反转，世盃首仗击败德国後次仗竟然输畀哥斯达黎加，领队森保一赛後向全国道歉，有日本球迷嘲讽：「森保一只系回复应有水平。」

今届世盃日本如坐过山车，首仗反胜德国後全球沸腾，森保一被吹捧上天，佢亦扬言「日本已达到世界级水平」，出发前定下嘅8强目标不是梦，点知第2场对哥斯达黎加，森保一竟然战术大师上身，作出5个主力轮换，令空有锐利攻力嘅日本无从发挥，更被对方一次突击绝杀。

森保一赛後接受访问时表示：「我哋本来谂住保持0比0，再喺尾段入波，但对手好强，对唔住支持我哋嘅日本球迷，嚟紧我哋要好好准备对西班牙。」

日本输波後球迷骂声不绝，之前闹过森保一无能嘅球迷，原本打算开启道歉大会亦可以悭番，有日本球迷网上指：「击败德国後变得自满，森保一今场立即打回原形。」

有球迷质疑今场用人：「正选阵容唔派得分王伊东纯也，改派失误较多嘅镰田大地，又唔信任三笘薰，用人相当消极，完全睇唔出佢想赢波。」