4年一度嘅世盃之所以受到全球注目，因为世界顶尖巨星都云集较技，周六(26日)晚到周日(27日)凌晨就成为巨星之夜，罗拔利云度夫斯基、基利安麦巴比同美斯轮流发威，带领所属国家队赢波，齐齐当选赛事最佳球员，尽显巨星魅力！

周六晚先系2020年、2021年世界足球先生罗拔利云度夫斯基做主角，佢交出1助攻同1入波，协助波兰2比0赢沙特阿拉伯，助球队2战得4分排C组榜首。呢个入波系「罗拔仔」球员生涯首个世盃入球，成为波兰史上第1个喺欧国盃同世盃都入过波嘅球员。

之後轮到法国前锋基利安麦巴比发威，佢包办2个入球带领法国2比1击败丹麦，喺D组提前出线。只有23岁嘅麦巴比，第2次参加世盃已累积7个入波，超越亨利(6球)、柏天尼(5球)、施丹(5球)等名宿嘅世盃入波，仅次於传奇方亭(13球)。

压轴登场嘅美斯就交出1射1传，帮陷於出局边缘嘅阿根廷重燃希望。美斯今仗全面向「上帝」马纳当拿嘅纪录进发，佢喺世盃总入球数已追平马纳当拿(8球)，另外又追平马纳当拿世盃21次上阵纪录，当中13场胜仗亦超越马纳当拿嘅12场，依家只差一个冠军奖盃，就可以超越「上帝」嘅成就。