之前咪讲过南韩综艺真人骚《射门的女孩们》，会由朴智星做领队，带咗两位节目主持李寿根同裴星才，同埋几位节目入面嘅球员去到葡萄牙，搵埋费高一齐分析吓今届世界盃南韩同葡萄牙嘅机会，同踢番场友谊赛嘅，大家有无搵到Link睇呀？

朴智星同费高嘅访问，系由喺南韩好出名嘅主播裴星才做主持，佢开始先用同世界盃H组嘅问题嚟当热身。裴星才提到南韩同葡萄牙会喺最後一轮交手，叫两位球星预测一吓比数，费高好快就答葡萄牙赢2比0，而谂咗一谂嘅朴智星就答1比1。(当时世界盃尚未展开)

虽然预测比数方面，朴智星同费高取态极一致，但当裴星才叫两位预测H组会由边两队出线嗰阵，唔知系识做定真心喇，竟然异口同声话葡萄牙同南韩。最抵死系佢哋答完之後，立即一齐大笑同击拳，同画面出现咗条标题：「戏剧性和解！」

问咗两条大路嘢之後，裴星才要求朴智星同费高玩「唔准谂即刻答」，呢部分亦系全个访问嘅戏肉，因为估唔到两位球星喺答嗰阵会咁触动人心，特别系「星仔」。裴星问咗几条问题，其中3条系咁：

【第一条】

1. 「我坐後备但球队赢波」，定

2.「我入3球但球队输波」？

费高：「我拣1，因为我渴望胜利，球队赢波就足够喇。」

朴智星：「我拣2，入3球喎！我会会尽力去帮球队争取胜利，都入得3球，唔会输啦！」

【第二条】

1. 「好好波但不受欢迎」，定

2. 「唔好波但好高人气」？

费高：「1，我唔会要求所有人都喜欢我，有就得！所以我宁愿好好波。」

朴智星：「一定系1，因为有一个人锺意我，支持我就够！」一答完，剧组就播放朴智星同佢老婆结婚嘅片段，加上充满爱意嘅音乐，Sweet晒。透过翻译，知道朴智星答咗咩之後，费高就话：「我都同意，不过我老婆同我拍拖嗰阵，佢唔知我系踢波嘅，哈！哈！」

【第三条】

1. 「17岁攞『金球奖』，但之後就退役」，定

2. 「冇奖，但终身成为球队嘅王牌」

费高：「一定系1！（裴星才表现得好意外）因为我好钟意『金球奖』，最多转行之後，做咩工作都带住个『金球奖』。」引到在场所有人大笑。

朴智星：「Um....2，我退役都一段时间，但我都仲有一个想法.......我想继续踢波，好想......。」原本由费高炒热咗嘅气氛，随之静晒.........。