世盃B组出线关键「美伊大战」，美国1比0击败伊朗抢走次名晋级资格，伊朗喺补时9分钟曾有超黄金机会，泰尼米门前抢点攻门疑被拉跌，个波碌到白界前被美国球员解围，如果呢球入到伊朗就会出线。4年前世盃，泰尼米同样喺最後一轮错失绝杀令伊朗出局，估唔到历史重演。

由於威尔斯输畀英格兰，伊朗只要打和美国就出线，最後阶段群起进攻，去到补时9分钟，伊朗将个波送入小禁区位置，泰尼米抢点疑被卡达域卡斯出手拉住，结果同美国门将马特端纳相撞倒地，个波就喺白界前被清走，伊朗球员包围球证要求睇VAR，但最终不得要领。

泰尼米最後一击失败，令人谂起4年前相同画面，当时伊朗喺分组赛最後一轮要赢葡萄牙先出线，最後阶段两队踢成1比1，泰尼米喺94分钟有黄金机会，但佢射门射中网侧，泰尼米亦喊到趴喺地下唔肯走，要队友扶住离场，估唔到4年後又要经历多一次心痛结局。

伊朗领队奎罗斯赛後表示：「我教过好多支球会同国家队，但从来未见过一班球员咁努力，而冇得到任何回报，足球有时就系咁唔公平，我哋要更加强壮咁返嚟，再次获得世人嘅尊敬。」