依家为葡萄牙征战世盃嘅C朗，由於曼联早前太迟决定同佢解约，因此好多球队周边商品，包括2023年官方日历、T恤、杯、锁匙扣等都有C朗唛头，红魔惟有割价促销，希望尽快清晒佢。

虽然今季曼联同C朗关系一直都好差，但球队去到世盃开打後先同佢解约，搞到一系列产品受影响，单系2023年官方日历，1月就有身披红魔波衫嘅C朗，都咪话唔尴尬，球队决定将有C朗唛头嘅周边商品割价促销。原价20镑（约190港元）嘅T恤减到5镑（约48港元），原价10镑嘅杯（96约港元）只卖5镑（约48港元），至於5镑（约48港元）嘅锁匙扣，依家2镑（约19港元）就有交易，但求清仓划清界线。

C朗同曼联一刀了断，但与另一支前东家祖云达斯嘅恩怨仍剪不断。由於祖记涉嫌造假数被调查，据报C朗嘅代表律师已要求呢支意大利班霸，支付1990万欧元（约1.63亿港元）欠薪，因为喺疫情期间，祖记同球员达成推迟出粮协议，但喺指定日期前未收到，所以C朗决定追数，不过祖记高层否认此事，睇嚟呢单劳资纠纷有排搞。