曼联趁英超空档期赴西班牙集训，约战当地球队友赛保持状态，阵中一班冇份踢世界盃嘅球星都有随队出征，不过就唔见查顿辛祖嘅身影。呢位仍受伤患困扰嘅曼联翼锋，继早前无缘入选英格兰世盃大军之後，今次连友赛都冇份去，仲被发现留喺英格兰自主操练。

「红魔」今次出征西班牙，将会与卡迪斯及贝迪斯两支西甲球队「拍跳」，准备英超重开。除了一班阵中小将之外，迪基亚、域陀连迪路夫及云迪碧克等唔洗踢世界盃嘅球员，都已经随球队到达当地，不过查顿辛祖就冇份随队。据报系坦哈格出到声，要求呢位前多蒙特球星留喺英格兰独自训练，仲话咁样做，系希望佢可以专心练波，重拾状态。

现年22岁嘅查顿辛祖，2021年加盟「红魔」被寄予厚望，今季开咧8场比赛一度攻入3球，可惜其後表现无以为继，连世界盃大军都冇佢份。唔知经过休赛期特训之後，查顿辛祖可唔可以踢返起呢？