克罗地亚能够喺世界盃16强淘汰日本，门将利华高域居功厥伟，呢位效力萨格勒布戴拿模嘅钢门今场3次扑出12码，成为世界盃史上第3位喺互射12码阶段救出3球嘅门将，对上1位正系上届世界盃克罗地亚门将苏巴锡。

利华高域今仗救出南野拓实、三笘薰、吉田麻也主射嘅12码，简直神乎其技，成为世界盃史上第3位做出呢个壮举嘅球员。无独有偶，克罗地亚上届世界盃16强，都系靠当时门将苏巴锡救出3球12码，淘汰丹麦。

利华高域上届世界盃都有入选克罗地亚大军名单，相信佢喺苏巴锡身上学到唔少嘢，今仗大派用场。

至於另1位系葡萄牙门将列卡度，佢喺2006年世界盃8强对英格兰，同样救出3球12码，协助葡萄牙晋级。