摩洛哥喺世盃16强互射12码淘汰西班牙，耶辛尼保奴2度扑出12码成为晋级英雄，赛後亦获选为今场最佳球员。耶辛尼保奴今届世盃踢咗300分钟，竟然从未被对手攻入过1球，摩洛哥有呢个守护神把关，成为创造历史嘅重要原因。

31岁嘅耶辛尼保奴喺加拿大出世，但父母都系摩洛哥人，佢细细个已经去西班牙踢波，过去10年都系效力西班牙球队，2019年开始一直效力西维尔，所以佢对今场对手西班牙非常熟悉。摩洛哥喺分组赛出线後，领队列格拉基被球员抛上天庆祝，今场呢个殊荣就去到耶辛尼保奴身上，佢获选为最佳球员後表示：「我感受到球迷嘅爱同支持，呢场胜仗系送畀摩洛哥人嘅礼物，我仲未意识到自己创造咗咩成就，我好开心，但要尽快专注下场比赛。」

摩洛哥今届4场比赛只失1球，而且对加拿大所失嘅1球仲系自己球员乌龙波，今届面对比利时、克罗地亚同西班牙3大劲旅都冇失波，就连互射12码都可以「0失球」！耶辛尼保奴除咗对比利时因伤缺阵外，其余赛事全部踢足，绝对系球队今届最大功臣。