西班牙喺世盃16强互射12码输畀摩洛哥黯然出局，「狂牛兵团」喺12码表现极差，3位操刀球员全部宴客，亦系佢哋连续第3届国际大赛射输12码出局。赛後西班牙领队安历基承认责任，但就唔肯谈论系咪会为出局引咎辞职。

西班牙喺加时最後2分钟换入沙拉比亚，明显系想佢帮手射12码，呢位前锋尾段曾有射门中柱，但做唔成英雄就变罪人，负责第1个12码嘅佢射失，之後卡路士苏拿同布斯基斯亦都宴客，西班牙12码输0比3。

安历基赛後表示：「全部都系我嘅责任，头3个12码球员系我拣嘅，我认为佢哋都系12码专家，之後嘅12码就由球员自己决定，可惜我哋连第4轮都唔使射......」安历基仲提到，佢喺世界盃前下令球员「做功课」，就系每人要喺踢决赛周前射1,000次12码，可惜最後都系得个吉。

上届世盃西班牙喺16强互射12码输畀俄罗斯、上年欧国盃就喺4强射输12码畀意大利，连续第3届国际大赛以最残酷方式出局。对於去留问题，安历基就回应：「依家唔系谈论我去留嘅时候，我想尽快返屋企见家人同只狗，等下个星期足总会长觉得时间合适，我哋就会倾之後嘅计划。」