克罗地亚中场莫迪历喺今届世盃，继续用大师级表现成为「格仔军团」核心，外界都十分关注呢位37岁中场，会唔会系最後一次喺国际大赛中献技，不过克罗地亚领队达历近日就大派定心丸，明确表示莫迪历会为「格仔军团」上阵，意味球迷有机会见到佢踢埋2024年欧国盃。

今届成果闯入世盃8强嘅克罗地亚，至今踢咗4场波，莫迪历全部以正选身分出战，系球队晋级功臣之一。领队达历近日接受访问时讲到莫迪历，就大赞呢位克罗地亚长青树嘅职业态度：「莫迪历非常努力去改善自己，嚟紧好长一段时间，我哋仲需要佢帮手。」达历续指今届世盃，唔会系呢位皇家马德里中场参与嘅最後一次喺国际大赛：「佢会继续为克罗地亚披甲，对此我非常肯定。」

克罗地亚将会喺世界盃8强遇上强敌巴西，作为莫迪历球会队友嘅森巴前锋云尼斯奥斯祖利亚，都对呢位中场大师十分仰慕，赛前仲向佢大派高帽：「要同高水平对手碰头永远都唔容易，莫迪历教咗我好多嘢，每日都帮我继续进步。佢、C朗同堤亚高施华，都系大家嘅榜样。」