摩洛哥虽然喺世界盃季军战输波，但佢哋可以淘汰2支劲旅西班牙、葡萄牙，成为赛事史上首支打入4强嘅非洲球队，已经令人刮目相看，赛後领队列格拉基豪言，15年後将有非洲球队夺得世界盃冠军。

列格拉基认为摩洛哥实力已经非常接近欧洲一线强队：「法国同克罗地亚嘅实力比我哋强，但距离并唔远，非洲球队有机会喺15年後捧世界盃，至於克罗地亚今场击败我哋，主因系对方大赛经验比较丰富，上半场占到先机，我哋下半场表现都唔错，我哋必须累积更多经验。」

列格拉基表示，摩洛哥下一个目标系夺取非洲国家盃冠军：「赢世界盃之前，必须先赢非国盃，我哋将会成为非洲球坛黄金一代。」下届非国盃将於2024年1月由科特迪瓦主办。

另外，今场季军战比赛之後，有多位摩洛哥球员包围球证抗议，不满对方判决，未知会唔会有手尾跟。