曼城18岁右後衞列高路易斯今季迅速冒起，近3仗更加担任正选，英国传媒指「蓝月亮」领队哥迪奥拿非常满意呢位小将表现，希望提早同佢续约。列高路易斯现时周薪仅5,000镑，预料续约之後有望增加至5万镑。

列高路易斯属於曼城青训产品，今季获提升上一队後演出抢镜，上阵9次入1球，而且仲系欧联对西维尔一役射入，含金量十足。

曼城原本正选右後衞基尔获加已经32岁，为英格兰出战完世界盃後，需要休息，所以列高路易斯近3场都踢正选，佢已证明自己有能力做基尔获加嘅接班人，难怪曼城希望尽快同佢续约。曼城将於周五(6日)凌晨英超作客车路士，预料列高路易斯将会继续担正。

另外，曼城中场贝拿度施华去留成疑，佢话要等到6月再同会方倾续约问题，毕竟自己仲有2年半合约在身，上年曾经传出巴塞隆拿计划收购呢位28岁葡萄牙国脚。