力争衞冕欧联同西甲嘅皇家马德里，1月转会市场冇乜声气，教练安察洛堤决定以静制动，季中唔会买人之余亦唔会放走任何球员，意味马高阿辛斯奥、丹尼施巴路斯等4位球星有可能会喺今季後约满离队。

马高阿辛斯奥、丹尼施巴路斯、拿祖费南迪斯同马里安奴戴亚斯4将，同皇马嘅合约去到季尾完结，一直有传皇马会喺1月将佢哋卖走，不过安察洛堤日前表示：「冇人同我讲过想喺冬季离队，大家都集中喺今季嘅目标上，皇马有好多比赛要应付，我需要全部球员候命。」

安察洛堤早前已表明今个转会窗唔会买人，皇马早前虽然有7,200万欧元高价收购巴西16岁神童恩迪克，但要等佢18岁生日先可以为皇马正式上阵。