葡萄牙球星C朗拿度转战沙特阿拉伯，足球生涯已步入尾声，据报佢喺葡萄牙花1,700万镑兴建嘅「退休屋」亦即将落成，依家已经进入招聘工人嘅阶段，不过因为C朗同女伴乔治娜太过嘴刁，搞到大厨嘅职位冇人敢应徵。

C朗喺葡萄牙Quinta da Marinha斥资1,700万镑兴建嘅豪宅，被视为C朗同家人嘅「退休屋」，消息指豪宅会喺今年6月落成，最近已经开始招聘工人，4,800镑月薪嘅管家等职位已经搞掂，不过4,500镑月薪请大厨就冇人应徵，令C朗非常头痛。

葡萄牙媒体报道，C朗同乔治娜太过嘴刁，佢哋要求厨师识得煮传统嘅葡国菜，又要识整寿司等国际美食，考起唔少大厨。报道指C朗一家近年爱上日本寿司，「退休屋」入面更特别设计一个寿司台畀大厨使用添。