曼联上星期喺「曼市打吡」靠争议入波反胜曼城，唔少球迷批评球证偏帮曼联，不过「红魔鬼」今仗作客水晶宫就冇咁好彩，麦汤米尼下半场一次禁区内被侵犯，球证同VAR竟然认为唔需要罚12码，令曼联球迷觉得被「打劫」。

曼联作客水晶宫认真黑仔，72分钟麦汤米尼杀入禁区，被水晶宫嘅基斯李察士出脚拦跌，但球证就认为冇事，般奴费南迪斯等曼联球员激烈投诉，VAR之後亦作出审查，结果系维持球证判决，曼联拎唔到12码之後，完场前更被水晶宫逼和痛失2分。

对於曼联呢个12码争议，《天空体育》主持列纳同格连梅利都指球证错判，格连梅利表示：「我认为呢个系12码，麦汤米尼已经摆脱咗基斯李察士，但佢伸脚出嚟又踢唔到波，我唔明点解球证唔去场边自己睇重播。」列纳亦附和：「完全同意，呢个系明显嘅误判。」

曼联球星般奴费南迪斯赛後亦表示：「场上睇麦汤米尼已经控制个波，对方尝试去拦截佢，呢啲判决系50/50，但我哋已经无能为力，依家只要集中应付之後嘅大战。」