北伦敦打吡落败後，热刺再传不利消息，热刺唔愿意延长干地合约，令该位意大利名帅完成今季合约後，好大机会离队，呢个状况对热刺下半季打欧联同争取英超前列非常不利。

热刺今季按照干地意愿增兵，签入李察利臣等球员，季初走势唔错，但近期有下滑迹象，近9场联赛输5场，干地亦多次发表言论，表示球队争英超前4有一定困难，为球队日後失利打定个底。

干地同热刺高层合作唔系太紧密，英国《每日邮报》报道，热刺主席利维唔愿意触发延长干地合约12个月条款，睇嚟唔想干地继续执教，但又唔即时炒佢，畀佢教埋今季，咁样对热刺最不利。

虽然热刺跌出前4，但同纽卡素及曼联只系相差5分，仲有得追，欧联16强抽签形势唔错，对手系干地熟悉嘅AC米兰，英足盃亦打入第4圈，如果依家同干地续约，可以消除好多不稳定因素，专心争冠，不过依家情况，干地去留已经成为热刺最大变数。

消息指热刺下任领队有两个，分别系前车路士主帅杜曹，或曾经喺热刺教得唔错嘅普捷天奴。