车路士喺今个月冬季转会市场疯狂增兵，继日前以天价8,800万镑收购萨克达嘅乌克兰翼锋梅迪克之後，又再签快翼，已经同荷甲球队燕豪芬达成协议，收购对方20岁新星马杜基，转会费为3,500万欧元。

马杜基对於车路士并唔陌生，因为佢本身系英国人，属於英格兰U21小国脚，而且佢曾经喺另外2支伦敦球队水晶宫及热刺青年军受训，2019年转投燕豪芬。

马杜基登陆荷甲後迅速冒起，2020/21年球季为燕豪芬各项赛事上阵32次入9球，上季亦有9球进帐，今季9次披甲入2球。据悉今次系车路士董事局钦点要求签入马杜基，可见非常睇好呢位小将未来发展前景。

马杜基重返英格兰之後，将来应该有机会同早前加盟利物浦嘅前燕豪芬队友加普交手。