纽卡素上仗英超打和水晶宫0比0，近4场联赛有3场同对手互交白卷，但唔代表「喜鹊」踢法保守，其实佢哋创造唔少攻势，特别系32岁老将捷比亚更加系进攻发动机。根据OPTA统计，呢位英格兰国脚今季英超已累积创造16次「重大入波机会」，欧洲5大联赛仅次於奇云迪布尼，仲多过阿根廷球王美斯。

纽卡素被沙特阿拉伯主权基金收购後，上年1月以1,200万镑向马体会收购捷比亚，当时并唔被睇好，毕竟佢喺西甲表现只属一般，而且年纪已经唔细。

不过，呢位右闸好快以行动证明自己有能力立足豪门，今季踢出事业颠峰水平，喺英超入1球及4次助攻，累积创造16次「重大入波机会」，欧洲5大联赛之中，仅少过曼城中场奇云迪布尼，排第2位，并比巴黎圣日耳门前锋美斯多1次。

身为後衞嘅捷比亚可以交出如此亮丽进攻数据，实在难能可贵，无奈队友把握力比较弱，浪费咗佢唔少传送，亦系纽卡素入波少嘅原因之一。

捷比亚喺右路助攻助守，并拥有不俗射罚球技术，纽卡素下仗英联盃4强对修咸顿，捷比亚将成为球队胜负关键人物。