日本球星三笘薰近期人气爆灯，继英足总绝杀利物浦後，周日(5日)凌晨英超再献绝杀，协助白礼顿主场1比0击败般尼茅夫，喺联赛榜稳守第6位。白礼顿领队迪萨比表明「永远唔会换走三笘薰」，仲离奇公开多谢呢位日本国脚嘅阿妈！

白礼顿今场占尽上风，全场控球率超过7成兼有20次攻门，不过面对般尼茅夫顽强抵抗，迟迟未能够打破僵局，直到完场前3分钟，三笘薰接应传中球以佢唔系最擅长嘅头槌顶入，亦系佢连续第3场比赛入波，为白礼顿全取3分。

白礼顿领队迪萨比赛後表示：「三笘薰系个伟大球员，关键系佢阿妈！因为三笘薰遗传咗天赋嘅才能，佢今场嘅表现唔系特别出色，但我永远唔会将佢换走，因为只要三笘薰留喺球场，系知道佢任何时刻都有机会入波。」