英超曼联主场斗水晶宫，「红魔」自复赛後弗到漏油，各项赛事近12仗豪取10胜1和1负，唯一败仗都系输畀榜首阿仙奴，佢哋上周中喺英联盃4强轻取森林2比0，两回合赢5比0进身决赛，勇达顶峰。若果单计联赛，曼联喺坦哈格带领下，今季头20仗赢咗12场，令佢成为球队史上赢波最多嘅新帅。（Now 621周六晚11时直播）

阵中主力华拉尼於前日宣布，退出法国队结束国际赛生涯，呢位曾为「高卢鸡」勇夺世盃冠军嘅中坚虽然只得29岁，但佢指代表国家征战10年，感到无比光荣，不过因频密赛程令伤患渐多，所以决定急流勇退，专注球会赛事，佢识咁谂，绝对系曼联之福。

另边厢，水晶宫状态欠佳，各项赛事近5仗只得2和3负未赢过，最大问题系王牌韦费特沙夏啱啱好番未弗，难怪近5仗入得两粒咁大把，点挡得住气势如虹嘅红魔呢？而且曼联主场出击特别醒，近12仗喺奥脱福出战嘅赛事全胜，其中10仗至少赢两粒，对客军嚟讲堪称「地狱球场」，红魔今仗让1/1.5球都冇有怕，照拣上盘。