周日（19日）英超头场，曼联弗爆前锋拉舒福特省两粒，连续7场英超主场入波，协助红魔喺主场以3比0击败李斯特城，福仔真系顺到冇朋友。

曼联於上周中欧霸淘汰圈附加赛首回合，被巴塞逼和2比2，嗰场停赛嘅中坚利辛度马天尼斯，今仗复任正选。不过李斯特城一开波即反客为主，先有哈维班尼斯近射被红魔门将迪基亚神勇扑出，之後轮到伊恩拿祖窄位抽射，畀域陀连迪夫闩出底线，冇耐呢位箭头近门头槌，又过唔到上晒身嘅迪基亚。「狐狸」久攻不下，25分钟更因後衞菲斯传失波被曼联截到，般奴费南迪斯靓直线交畀拉舒福特先开纪录，呢球亦系福仔连续7次喺主场出战联赛有士哥，弗到漏油。

易边後曼联未有放松，劳基梳尔开出罚球，可惜利辛度马天尼斯劲顶中楣。56分钟福仔接应费特洛迪古斯妙传快射破网，虽然一度以为佢越位，但经VAR检查後证实菲斯包咗越位，判入球有效，近17场入16球，效率奇高，5分钟後般奴费南迪斯再次交出助攻，後备入替嘅查顿辛祖射成3比0，顺利全取3分，稳居联赛第3位，只落後次席曼城3分。