曼联前锋拉舒福特今季表现大熟大勇，各项赛事上阵35场入22球，已追平个人单季最多入波纪录，会方正在同呢位25岁英格兰国脚倾续约，据悉红魔鬼管理层开出30万镑周薪，以及下季将7号球衣交畀「福仔」，利诱佢续约。

英国《太阳报》指曼联主帅坦哈格不断鼓励拉舒福特入更多波，为佢订下目标今季入35球，可见佢对呢位前锋抱有好大期望。球会管理层亦认定拉舒福特可以成为担大旗人物，除咗愿意向佢提供天价30万镑周薪新约之外，亦计划将「传奇7号」交畀佢。

众所周知，曼联7号波衫喺球队史上有重要地位，以往灵魂人物简东拿、碧咸、C朗都着7号。C朗离队之後，7号仍然悬空，如果拉舒福特可以成为红魔「R7」，相信佢一定乐意续约留队。

此外，据悉等曼联易主之後，好可能收购热刺前锋哈利卡尼，由於佢着惯10号，安排拉舒福特转着7号，将10号留畀哈利卡尼，亦系一个完美安排。