皇家马德里前锋宾施马状态巅峰，不过呢位法国国脚已经35岁，今季伤病次数亦增多，球会亦准备为佢物色接班人。皇马上场联赛赢奥沙辛拿，乌拉圭新星艾华路洛迪古斯首演，只系用3分钟时间就赢到教练安察洛堤欢心，更被睇好成为宾施马接班人。

宾施马因伤缺阵对奥沙辛拿，安察洛堤就徵召青训前锋艾华路洛迪古斯入队，佢喺87分钟获派上阵，实现西甲首演，结果佢喺几分钟内交出2次精彩助攻(其中1次被判越位)，协助皇马赢波，安察洛堤讲明今季余下赛事会预埋佢：「艾华路洛迪古斯好有才华，身材高大之余，可以控球又可以顶头槌，我深信佢可以喺今季余下赛事帮到手，我会同鲁尔(皇马B队教练)倾下，畀佢多啲时间跟一队比赛。」

18岁嘅艾华路洛迪古斯喺西班牙出世，但就选择代表乌拉圭青年军出赛，佢话自己一直向前辈学习：「作为皇马球员，我嘅主要模范当然系费达历高华维迪，我想跟随佢嘅成长轨迹，我亦睇好多苏亚雷斯、卡云尼等传奇嘅比赛，尝试学习佢哋。」