周四(23日)凌晨欧联16强首回合赛事，英超劲旅曼城作客被RB莱比锡逼和1比1，两队今仗各踢半场好波，不过曼城喺完场前一刻本来有机会获得12码，但球证同VAR竟然无视一次极明显嘅禁区内手球事件，引起各方质疑。「蓝月亮」和波後，英超4队喺欧联16强无一获胜，真系失威。

曼城上半场踢得极具侵略性，27分钟喺前场压逼成功，马列斯接应根度简妙传禁区内射成1比0，曼城上半场有高达74%控球率兼94.6%成功传球，不过下半场形势逆转，RB莱比锡反占上风，70分钟由加华度尔接应角球顶入，两队踢成1比1平手。

补时2分钟出现争议一幕，洛迪卡斯简迪禁区内头槌顶波，轩历治斯双手举喺胸前将个波挡走，但球证同VAR都全无反应，随即鸣笛完场，引嚟曼城球员激烈投诉。为电视台评述嘅里奥费迪南表示：「呢个一定系手球，轩历治斯尝试将个波推走，曼城球员嘅反应已经话你知咩事。」

虽然欧联有VAR系统，不过负责球证亦冇作出审查，前英超球证禾顿透露：「我有一个萤幕系同欧洲足协连接，可以睇到VAR做紧乜，我好惊讶佢哋系冇睇呢次手球事件。」至於曼城领队哥迪奥拿就话：「我睇唔到，所以冇得评论，不过我知道呢啲情况会发生乜事。」

曼城次回合返主场出击，晋级形势仍然占优，不过佢哋被逼和後，英超4队喺欧联16强首回合全部赢唔到，热刺0比1输畀AC米兰、车路士0比1输畀多蒙特、利物浦更以2比5惨败喺皇家马德里脚下，曼城和波已经系英超最叻仔嗰队。