曼联喺周中欧霸出战巴塞前夕，主帅坦哈格畀英国传媒影到佢密会红魔传奇教头费格逊，唔通费Sir有锦囊妙计献畀坦帅？

曼联今季重组顺风顺水，同主帅坦哈格领导有方不无关系，单系坚决赶走C朗已经够「吉士」。日前坦哈格被英国传媒影到佢喺曼市一间意大利餐厅，同红魔传奇教头费格逊共进晚餐，席间两人言谈甚欢，虽然唔知两人倾乜嘢，但见坦哈格对住费Sir恭恭敬敬，犹如学生上堂听老师教书。

曼联除咗喺周五凌晨欧霸附加赛迎战巴塞外，嚟紧周一凌晨於英联盃决赛硬撼纽卡素，坦哈格好可能迎来佢上任後首项冠军，对佢嚟讲绝对系重要嘅一周。讲到对巴塞，费Sir真系经验丰富，1991年佢率领红魔喺欧洲盃赛冠军盃以2比1击败巴塞，2008年曼联勇夺欧联，喺4强正正系淘汰「地上最强」，当然费Sir亦试过於2009及2011年欧联决赛，输畀呢支西甲班霸，如果佢真系出谋献策，有助增加曼联胜算。