曼联领队坦哈格去年上任後，短时间内将球队拨乱反正，周一(27日)凌晨英联盃勇夺冠军，「4冠王」之路先过1关，亦打破曼联5年零278日嘅锦标荒。心情靓爆嘅坦哈格赛後罕有同球员跳舞庆祝，而且先後3度豪言：冠军会陆续有来！

荷兰教头坦哈格执教曼联开季3连败，一度令球迷质疑佢嘅领军能力，但佢逐步为球队注入纪律、团结等元素，将缺态嘅大牌球星哈利马古尼、C朗拿度雪藏及踢走，成功令「红魔鬼」复苏。今次冠军系自2017年欧霸盃後，相隔5年零278日再次夺冠，终止自1983年以来曼联最长嘅锦标荒(6年零5日)。

曼联球员喺温布莱球场大事庆祝，向来「铁腕」嘅坦哈格亦罕有咁同利辛度马天尼斯、安东尼马菲奥斯激情跳舞，成为最抢Fo嘅一幕。曾经批评巴西领队迪迪喺世盃跳舞庆祝嘅坚尼，亦讲笑叫坦哈格应为跳舞辞职，坦哈格就发表冠军宣言：「我哋之前跳过，一齐(喺阿积士)经历过，希望之後可以继续跳舞庆祝捧盃！」

坦哈格喺赛後再次强调英联盃冠军只系开始：「我哋先要赢1个冠军，依家我哋做到，呢个冠军会畀球员更大信心，曼联只系开始复兴之路，即系赢好多冠军，呢个只系第1个。」坦哈格喺记者会完结後，离开嗰阵被提醒要拎埋个盃，坦哈格就再三强调：「摆低冇所谓，因为我会赢第2个。」