国际足协年度最佳颁奖礼周二(28日)凌晨喺巴黎举行，带领阿根廷赢世界盃嘅「球王」美斯，毫无悬念击败基利安麦巴比同宾施马当选世界足球先生(最佳男子球员)，亦系佢历来第7次当选，进一步刷新呢项前无古人嘅成就。阿根廷同时包办埋最佳领队同最佳门将，系史上首次有球队包办3大奖项。

今届国际足协(FIFA)为颁奖礼改制，由以往计算季度变为年度，所以之前喺金球奖30强不入嘅美斯，可以靠上年底卡塔尔世盃嘅非凡表现突围，最终喺球迷、记者、国家队领队同队长4个范畴投票中，以52分击败麦巴比(44分)同宾施马(34分)成功当选世界足球先生，3人同时亦齐齐入选最佳11人阵容。

35岁嘅美斯喺上年12月，第5度出战世盃终圆冠军梦，依家时隔4年再夺世界足球先生，佢上台领奖嗰阵感触表示：「呢一年好疯狂，我奋斗咗咁耐终於实现世盃冠军梦想，呢个系所有足球员嘅梦想，但只有少数人可以做到，好感激上帝畀我成为呢少数嘅人。」

世界足球先生经过多次改制，美斯喺2009年首夺世界足球先生，之後喺同金球奖合并嘅6年入面4次封王，2016年开始再改以「年度最佳」方式颁发，美斯喺2019年再次登顶，今次系第7次登上世界足球先生宝座，进一步抛离5次得奖嘅葡萄牙球星C朗拿度。

除美斯之外，阿根廷亦系今次颁奖礼大赢家，主帅史卡朗尼击败皇家马德里教练安察洛堤当选「最佳领队」，门将达米安马天尼斯亦力压皇马嘅泰拔高图尔斯荣获「最佳门将」，系史上首次由同一国家球员包办最佳球员、最佳门将同最佳领队3大奖项，认真威水。

FIFA颁奖礼2022各奖项得主

最佳球员(男子)：美斯

最佳球员(女子)：佩迪拉丝

最佳领队(男子)：史卡朗尼

最佳领队(女子)：威格曼

最佳门将(男子)：达米安马天尼斯

最佳门将(女子)：伊比丝

普斯卡斯奖：奥历斯

公平竞技奖：卢祖舒维利