曼联拎到5年几以来首个冠军，头槌先开纪录嘅卡斯米路功劳极大，呢位斗心超强嘅巴西中场系天生胜利者，佢对上9次出战决赛，所属球队全部成功捧盃！菲尔锺斯赛後表示，卡斯米路系曼联嘅精神领袖。

曼联领队坦哈格季前头号目标系法兰基迪庄，结果倾唔掂而改签卡斯米路，当时唔少球迷认为用6,000万镑签31岁嘅中场系错误决定，但结果卡斯米路证明佢嘅影响力。今场系呢位巴西国脚历来第17次盃赛决赛，佢赢咗其中15次，包括最近9次入决赛全部捧盃，入面仲有4场系欧联决赛，而卡斯米路喺2017年欧联决赛，亦攻入领先祖云达斯嘅关键入波。

几乎被遗忘嘅菲尔锺斯，今季虽然冇份落场比赛，但亦感受到卡斯米路嘅影响力：「卡斯米路令全队变得冷静，佢嘅领导同比赛风格对队友极具影响力，只要佢在阵中，你就见到呢支曼联系几咁成功。」卡斯米路完场後被影到同般奴费南迪斯就比赛细节出现争执，球迷都大赞佢赢咗冠军，仍然对比赛做得唔好嘅地方执着，绝对系天生胜利者！