宾福特前锋艾云东尼上年底被英格兰足总控告违规赌波，英国传媒周三(1日)报道，呢位26岁球星已承认262条赌波控罪入面多项指控，预料足总会喺短期内展开正式聆讯，艾云东尼好大机会喺今季之内，被重罚数个月嘅停赛处分。

艾云东尼今季英超入14球，喺射手榜仅次於艾宁夏兰特同哈利卡尼，佢上年被指控喺2017年至2021年间，多次违反英格兰足总赌波条例，虽然消息指艾云东尼从未喺自己有份参与嘅赛事下注，但行为仍然系被禁止，涉及罪名多达262条，最新消息系艾云东尼已承认当中一大部份嘅指控，佢亦已做好长期停赛嘅心理准备。

根据过往例子，违规赌波嘅停赛系以月计，捷比亚喺2019年曾畀内幕贴士，叫朋友投注佢会由热刺转投马德里体育会，结果被停赛2个半月兼罚款7万镑；祖尔巴顿喺2016年被控喺10年内赌波1,260次，结果被罚停赛1年半，佢最後选择直接挂靴；史杜列治喺2018年亦被控就转会投注畀料，被罚停赛4个月。

英国《太阳报》报道，英格兰足总会喺数星期内对艾云东尼展开聆讯，预计停赛令会喺今季内展开，严重打击宾福特争入欧洲赛嘅机会。另外，艾云东尼原本被视为英格兰出战3月同6月欧国盃外围赛嘅热门人选，但今次赌波事件随时影响佢嘅英格兰国家队前途。