近期状态下滑嘅巴塞隆拿，星期五(3日)凌晨西盃作客皇家马德里，球会赛前证实罗拔利云度夫斯基拉伤大腿，预计要缺阵2至3个星期。不过「罗拔仔」受伤对巴塞嚟讲又未必系灾难，事关呢位波兰前锋今季5场缺阵嘅赛事，巴塞全部赢晒。

「罗拔仔」老婆Anna系营养师，所以平时都好少受伤，原来佢对上一次受伤缺阵已经系2年前效力拜仁慕尼黑嘅事，佢今季缺席过嘅5场比赛，有2场系盃赛休息同埋3场停赛。有趣嘅系，巴塞喺呢5场比赛全胜，3场西甲都赢1比0，2场盃赛就狂入8球，似乎影响唔算太大。

喺罗拔仔缺阵期间，安素法迪系首席替补，但呢位新星依家同样受伤，预料费伦托利斯会担大旗。事实上，「罗拔仔」喺世盃前14场联赛入13球，但世盃後6场联赛只入2球，佢嘅脚风亦影响到球队表现，依家抖下或者唔系坏事。