国际足协嘅世界足球先生(最佳男子球员)系由传媒、球迷、国家队领队同球员投票选出，4个范畴各占25%积分，而且选票全部实名公开，透明度极高，球迷对於一众球星同领队嘅心水都好有兴趣，而且仲有唔少古怪投票添！

每个投票者可以按次序选出头3名最佳球员，除美斯、麦巴比同宾施马3甲之外，另有仲11名球员收到「第1名」选票。唔少投票者都会偏爱「自己友」，好似摩洛哥队长路曼沙斯，就将第1名选票畀队友阿舒拉夫，而沙迪奥文尼所拎到嘅11张「状元票」，全部嚟自非洲领队、球员或传媒。

虽然美斯系阿根廷「球王」，不过新星祖利安艾华利斯都有4张第1名选票，包括嚟自加蓬、博茨瓦纳同列支敦士登嘅选票，不过以西班牙新帅富安迪嘅投票最令人「O嘴」，佢嘅头3名依次系祖利安艾华利斯、祖迪比宁咸同莫迪历，美斯就3甲不入，口味真系与别不同。

哈利卡尼、纽亚、邦路斯、罗拔利云度夫斯基、马田奥迪加特、孙兴民、布斯基斯等球星全部都排美斯第1，而美斯本人就将第1名投畀老友尼马。

香港队主帅庄恩安达臣亦将首名投畀挪威同胞艾宁夏兰特，麦巴比同美斯分别第2、第3位，港队队长叶鸿辉投票前3名系美斯、麦巴比同莫迪历。