上季带领皇家马德里赢欧联同西甲嘅宾施马，喺世界足球先生选举输畀美斯失落奖座，虽然结果都系意料之内，不过大批球迷就将怒火发泄喺阿拉巴身上，批评呢位奥地利国家队队长喺投票中，投畀美斯而唔系宾施马，闹佢系「反骨仔」，逼到阿拉巴要公开澄清。

以奥地利队长身份投票嘅阿拉巴，头3名依次系美斯、宾施马同基利安麦巴比，皇马球迷对於佢只系将宾施马排第2非常不满，纷纷留言炮轰：「踢走阿拉巴」、「反骨仔」，甚至有人用猴子图案对佢作出种族歧视，阿拉巴见众怒难犯，亦喺社交网出嚟交代。

阿拉巴解释：「关於世界足球先生投票，奥地利一票唔系我自己选择，而系全队球员嘅决定，排名系所有球员一齐投票定出。我对宾施马嘅表现非常欣赏，呢点所有人都知道，尤其系宾施马。」