世界盃冠军阿根廷公布最新一期大军名单，曼联18岁新星加拿祖获得徵召，备战3月底2场热身赛。早前盛传西班牙有意徵召呢位喺马德里出世嘅天才翼锋，但加拿祖似乎倾向为阿根廷效力，跟随球王美斯学嘢。

阿根廷领队史卡朗尼今次徵召35人入国家队，2位曼联球员加拿祖、利辛度马天尼斯榜上有名，当中以加拿祖入选最受关注，因为呢位新星今季表现突出，加上佢妈妈系阿根廷人，有资格拣选代表阿根廷或者西班牙国家队，成为两国争夺目标。

以现时情况睇，阿根廷喺抢人才方面占上风，加拿祖倾向代表呢支南美洲劲旅。事实上，上年3月加拿祖已曾入选阿根廷大军名单，备战世界盃外围赛，但并冇上阵，仅为阿根廷U20披甲。

阿根廷将於3月底同巴拿马、库拉索交锋，但由於只属热身赛，就算加拿祖到时上阵，之後都仲可以改变主意，有权再拣西班牙。