车路士今季豪掟6亿镑买人，但喺英超成绩沉沦，一众贵价球星变晒做「水货」，冬季转会窗以1.05亿镑转会费加盟嘅安素费南迪斯，更由堂堂世界盃冠军变为欧洲5大联赛「最贵雪糕筒」，似乎只有尼高路简迪可以打救呢位阿根廷中场。

据《WhoScored》数据显示，自安素费南迪斯加盟车路士後，平均每场畀对手扭过3次，系同期欧洲5大联赛平均被扭过次数最多球员，惨被网民笑系「最贵雪糕筒」。车路士喺欧联16强首回合输畀多蒙特，安素费南迪斯被艾迪耶美狂爆食尘一幕就相当肉酸，上场联赛输畀热刺又系佢抢住解围交失而导致失球。

不过亦有车路士球迷为佢辩护，指防守中场唔系安素费南迪斯最擅长嘅位置，法国中场尼高路简迪近日全面复操，呢位曾经嘅「世一」防中复出，有望解放安素费南迪斯做更多进攻任务，至少唔使再畀对手当雪糕筒咁扭。