曼联中场费特过往因为表现差，被网民寸系「废凸」，呢位刚於3月5日30岁生日嘅巴西国脚踏入2023年之後，演出脱胎换骨，近3次上阵更加有2球进帐，成为曼联力保争夺4冠王美梦嘅功臣。

费特今季为曼联各项赛事上阵36次入6球，创出佢2013年登陆欧洲球坛之後，个人单季入球新高，其中欧霸盃附加赛次回合对巴塞隆拿，上仗英足盃16强对韦斯咸，都射入关键入波，成为反胜晋级嘅功臣。

费特分享自己大翻身原因，佢话：「领队坦哈格带来好多嘢，佢令更衣室充满活力，我哋阵容人脚同以前分别唔大，但心态唔同咗，造成结果唔同。同埋我锺意同卡斯米路并肩作战，佢喺皇马赢过好多冠军，喺巴西国家队有非常好嘅心态，佢系曼联好重要一员。」

事实上，由於卡斯米路负责更多中场拦截工作，「解放」咗费特，令佢可以发挥进攻能力，入波数字自然增加，曼联将於英超作客利物浦，费特随时又有波入，作为生日礼物。