神奇球队宾福特勇态持续，周二(7日)凌晨英超主场3比2击败富咸，将联赛不败走势增加至12场。早前承认「违规赌波」指控嘅前锋艾云东尼，今场以「戴罪之身」继续上阵兼入波，而佢百发百中嘅12码纪录再成焦点。

英格兰足总仍未就艾云东尼违规赌波进行聆讯，呢位前锋仍然可以继续上阵，主队开波6分钟就由宾诺克先开纪录，富咸39分钟由沙洛文追平。53分钟宾福特获12码，艾云东尼操刀射入，85分钟马菲亚斯赞臣入波拉开到3比1，富咸喺补时最後一刻由卡路士云尼斯奥斯追番2比3，可惜为时已晚。

艾云东尼今场射入12码，系佢加盟宾福特以来第10次喺英超操刀，结果系100%命中，仲差1球就会追平耶耶托尼11射全中嘅英超纪录。宾福特领队法兰克赛後表示：「艾云东尼系世界最佳12码刽子手，佢嘅策略、练习同冷静系最大原因，场外事件对佢冇任何影响，佢嘅专注力系一流。」