巴黎圣日耳门(PSG)喺欧联16强作客拜仁慕尼黑嘅生死战前，收到一个极大噩耗，巴西前锋尼马将会进行足踝韧带修复手术，预计会缺阵3至4个月时间，今季肯定唔能够再上战阵。

尼马喺上月对里尔一仗受伤，喊住被担架抬出场，对上2场联赛都冇上阵，PSG周二就发声明表示：「尼马右脚足踝近几年健康情况好唔稳定，上个月再一次受伤後，医生建议进行韧带修复手术，避免旧患复发嘅严重风险，所有专家都认同有做呢个手术嘅必要，尼马将会喺3至4个月後重投操练。」

据报手术会喺卡塔尔嘅多哈进行，今季将会提早收咧，佢受伤前今季法甲上阵20场入13球。现年31岁嘅尼马同PSG合约去到2025年，喺佢缺阵情况下，PSG仍有美斯同基利安麦巴比会挑起进攻大旗。