近期死火嘅英超劲旅热刺，周四(9日)凌晨欧联16强次回合，主场只能同AC米兰闷和0比0，两回合合计输0比1出局。拥有豪华锋线嘅热刺已经连续3场「食白果」，主场球迷赛後狂嘘领队干地，甚至唱前领队普捷天奴嘅歌以示支持佢回巢执教。

热刺今场有干地复出督师，希望收复首回合输0比1嘅失地，不过面对防守力强嘅AC米兰未能制造太多埋门，全场只有2次命中目标攻门，阿根廷中坚基斯甸罗美路更喺77分钟粗野犯规，两黄一红被逐离场，最终热刺只能0比0打和，喺一片嘘声中出局。

热刺自2019年普捷天奴带队喺欧联4强赢阿积士後，就未曾喺欧联淘汰赛赢过波，热刺主场球迷完场後就高唱普捷天奴嘅歌曲，表达希望搵佢回巢取代干地嘅意愿。干地赛後嘅言论更令球迷不满：「我哋可以做得更好，但我好难怪责球员嘅努力，其实我哋已经有进步，上季热刺连欧协联分组赛都出唔到线......」