日本国脚三笘薰今季喺英超弹起，近期更加成为白礼顿进攻主力，近10场联赛攻入6球，上场联赛对韦斯咸入波後，令佢追平日本球员喺英超嘅入球纪录，周六(11日)对列斯联有望创日本造历史！

日本球员喺英超1季入球纪录，系香川真司(曼联)同冈崎慎司(李斯特城)嘅6个入球，三笘薰上场已经追平，今季再入波就可以独占纪录，佢话：「我有留意呢个纪录，我会尽力入更多波，不过入波唔容易，当球队踢得好我会有更多机会，我会以白礼顿为先，再尽力为自己争取入球。」

25岁嘅三笘薰前年8月由川崎前锋转会白礼顿，据报转会费只系260万镑，首季外借到比甲圣基莱斯联，今季收回自用，随住李安度杜沙特转投阿仙奴，佢已成为白礼顿嘅前线核心。