曼联经历「双红会」惨败後，喺欧霸盃大胜贝迪斯重振雄风，备受批评嘅韦格贺斯更加攻入佢喺奥脱福首个入球，虽然只系4比1锦上添花嘅入波，但呢位荷兰国脚仍非常激动，眼泛泪光，领队坦哈格再次大赞佢系曼联无名英雄。

韦格贺斯1月由般尼以借用身份加盟，只系喺英联盃作客森林入过1球，Opta数据显示，佢喺奥脱福球场累积22次攻门都冇波入，今仗喺第23次埋门终於入波，佢第1时间冲去角球旗跪低庆祝，激动到几乎喊出嚟。韦格贺斯日前因为作客利物浦摸「This Is Anfield」标志，被曼联球迷炮轰，今次喺奥脱福入波令佢如释重负。

曼联领队坦哈格赛後表示：「作为一个前锋，佢之前已经好多次好接近入波，韦格贺斯一直帮助队友制造空间同机会，依家终於拎到佢应得嘅入球。」