曼联右後衞达洛治近年表现出色，会方正在力争同呢位23岁葡萄牙国脚续长约，但过程并唔顺利，根据西班牙《阿斯报》爆料，西甲劲旅皇马计划签入达洛治，作为老将丹尼尔卡华积嘅接班人。

达洛治2018年以1,900万镑转会费由波图加盟曼联，虽然一度被投闲置散，甚至曾於2020/21年球季被外借去AC米兰。不过，呢位助攻力极强嘅「带刀侍衞」近2季已奠定曼联正选位置，并於上年世界盃为葡萄牙3次正选上阵。

虽然曼联早前已启动自续约条款，同达洛治延长合约至2024年夏天，但并唔稳阵，会方希望尽快同佢签长约，以免夜长梦多。曼联管理层嘅忧虑的确有道理，因为皇马计划游说达洛治加盟，代替已经31岁并经常受伤嘅丹尼尔卡华积。

据悉皇马可能会同达洛治达成「君子协定」，等佢明夏约满以自由身加盟。皇马之前都试过签入2位自由身名牌後衞阿拉巴、鲁迪格，今次又想重施故技。

值得一提，达洛治嘅经理人佐治文迪斯上年曾经教唆佢唔好同曼联续约，并转投巴塞隆拿，虽然最後未成事，但依家又要面对皇马抢人，曼联要留住呢位猛将，并非易事。