曼城中场根度简近日荣升做爸爸，呢位德国国脚周四(16日)宣布，老婆Sara诞下两人首个爱情结晶Kais。据报初为人父嘅根度简将会缺席德国月底对秘鲁同比利时嘅两场热身赛，专心做「凑仔公」。

曼城周中欧联大胜RB莱比锡7比0，根度简都有份入波，赛後佢更初尝人父滋味，老婆Sara喺社交网贴上根度简抱住BB嘅相片，相当温馨。德国《天空体育》报道，德国领队费历克新一轮国家队名单唔会挑选根度简，但主要原因系畀佢安心照顾家人，并唔系因为世界盃决赛周嘅差劲表现而受惩罚，根度简仍然喺费历克未来计划之中。

根度简同曼城嘅合约去到季尾完结，目前仍未有续约消息，传早巴塞隆拿有意向佢提出聘约，不过根度简目前最大目标，系帮曼城争夺英超、欧联同英足盃「3冠王」。