意甲上演国家打吡，国际米兰主场硬撼祖云达斯。国米啱啱喺欧联进身8强，士气大振，佢哋主场出击特别醒，面对伤兵满营嘅祖记，可藉地利杀退死敌，让半一照捧上盘。（Now 639周一凌晨3时45分直播）

国米喺上周中欧联16强次回合，同波图互交白卷，两回合计赢1比0惊险晋级，8强将会遇上另一葡超劲旅宾菲加，亦系佢哋自2011年後再次杀入8强，确能振奋军心。

未计今轮，国米虽然喺联赛位居次席，但只系比第5位罗马多3分，前4嘅下届欧联入场券未稳袋，仍需抢分，佢哋今季战绩不稳，与客场表现飘忽有关，相反主场保持水准，各项赛事近5仗主场赢晒兼只失1球，前锋拿达路马天尼斯近4仗主场入3粒，佢喺自己地头出击特别醒。

另边厢，祖记近6仗联赛获5胜1负，睇落好似唔错，其实大部分对手实力偏弱，作客稍强嘅罗马即输波，上轮面对攻力疲弱嘅包尾大幡森多利亚，领先两球下竟一度被追和，虽然最终赢4比2，但表现唔算突出。

加上近排祖记备受伤停困扰，保罗普巴、邦路斯及迪马利亚均有伤在身，後两者上阵成疑，箭头摩斯坚恩今仗亦要坐波监，阵容不整情况下，今仗相信凶多吉少。