荷兰中场新星赖恩格云贝治，上年夏天加盟拜仁慕尼黑後发展不似预期，喺拿高斯文或杜曹执教下都未受重用，不过求才若渴嘅利物浦对佢就非常欣赏，据报近日已经正式展开收购行动，而赖恩格云贝治嘅「红军Look」更抢先曝光！

英国《泰晤士报》报道，利物浦放弃收购祖迪比宁咸後，转打另一德甲中场主意，今季喺德甲只踢过1次正选嘅赖恩格云贝治对转会当然唔抗拒，报道指利物浦代表上星期已飞德国，同赖恩格云贝治爸爸兼经理人见面商讨，拜仁早前落实夏季签入RB莱比锡中场干拉特赖马後，亦唔会阻赖恩格云贝治转会，预计转会费为2,500万镑。

赖恩格云贝治能唔能够加盟利物浦系未知数，但有网民率先发布佢嘅「红军Look」，消息指张相系喺几年前拍摄，佢着嘅系19/20球季利物浦波，而且系前利物浦荷兰小将基贺华送畀佢嘅礼物，利物浦球迷又觉得啱唔啱睇呢？