曼城喺英超榜首大战4比1大破阿仙奴，结果并唔令人意外，事关曼城一向系阿仙奴「克星」，连埋今场在内，曼城喺英超已经连续12次击败阿仙奴，难怪门将艾达臣摩拉斯咁风骚，喺攻入第4球後走向阿仙奴球迷面前做出「喊包」动作。

曼城系阿仙奴嘅「克星」，近6季12次喺英超交锋，曼城录得全胜，总比数系33比5嘅压倒性赛果。阿仙奴对上一次联赛对曼城唔使输，已经要数到2017年4月主场打和2比2，当时正选连後备只有格列沙加一个仍然在阵。

曼城今场赢得精彩，巴西门将艾达臣摩拉斯全场清闲，当艾宁夏兰特射入4比1後，佢就拧转身向作客嘅阿仙奴球迷做出抹眼泪嘅喊包手势，即刻获曼城球迷欢呼支持，相当风骚！