曼联今季表现大跃进，不过西班牙门将迪基亚就变「神经刀」，虽然多数时间都有稳健演出，但每次犯错都相当攞命。据Opta数据显示，迪基亚上季曾5次犯错导致失球，今场对韦斯咸又录得今季第4次犯错导致失球，追平热刺门将洛里斯成为No.1，有望「冧庄」英超犯错榜！

虽然迪基亚犯错频频，但领队坦哈格赛後继续力撑，更公开呼吁佢续约，下季继续把关：「我哋想迪基亚续约，想佢继续留队，下季继续同我哋一齐。迪基亚今场犯错，但佢系个出色门将，如果唔系佢今季嘅表现，曼联未必排到呢个位置，犯错系比赛一部份，我哋要识得面对同反应。」

不过曼联球迷同球员就未必有咁好耐性，有网民发现当迪基亚犯错後，拉舒福特嘅第一时间反应系双手抱头，望住场边目击惨剧嘅坦哈格，网民留言表示：「曼联球员睇到自己个龙门连日常扑救都做唔到」、「拉舒福特用眼神叫坦哈格搵新龙门」、「拉舒福特嘅眼神无声胜有声」......