皇家马德里周日(14日)凌晨西甲，主场以1比0击败基达菲，教练安察洛堤派出多位副选，留力欧联4强次回合作客曼城生死战。不过人算不如天算，作为3个保留正选位置之一嘅卡马云加，喺比赛尾段左膝恐怖扭伤，被换走後亦要敷冰治痛，周四(18日)对曼城一仗上阵成疑。

皇马为留力欧联4强，今场收起晒宾施马、云尼斯奥斯祖利亚等主力，正选只系得泰拔高图尔斯、卡马云加同费达历高华维迪3人有份踢对曼城一战。皇马半力出击仍控制战局，结果凭马高阿辛斯奥喺70分钟攻入全场唯一入球，1比0小胜。

最令皇马球迷担心嘅，系卡马云加喺尾段被踩死脚後，左脚膝头亦扭伤，呢位法国球星表现痛苦，换走後亦用大块冰袋敷住膝部位置。皇马教练安察洛堤赛後表示：「卡马云加扭亲膝头，但情况稳定，膝头入面情况令佢困扰，但应该冇乜大碍。」