白礼顿今季成绩突出，数字上仍然有机会争夺欧联席位，意大利教头迪萨比嘅领军能力广受好评。白礼顿上场作客3比0大胜阿仙奴，踢出今季其中一场代表作，原来赛前迪萨比曾播放篮球天王米高佐敦(MJ)嘅影片，刺激球员斗志，结果收到奇效。

白礼顿上星期主场1比5惨败爱华顿脚下，迪萨比为鼓励球员，作客阿仙奴前专登播米高佐敦嘅影片畀球员睇，希望用呢位出名「打不死」嘅传奇嚟激励球队，白礼顿前锋安达夫表示：「领队播MJ嘅影片畀我哋睇，睇佢点样喺每场比赛前自我激励，我觉得非常合适，我哋(对阿仙奴)亦展示出强大嘅意志。」

迪萨比亦表示：「我嘅工作就系将自己嘅风格同理念贯输畀球队，当中第一条法则就系精神意志，白礼顿要成为一支比依家更好嘅球队。我自己唔系特别锺意篮球，但系我锺意任何冠军运动员嘅意志，如果我可以喺佢哋身上学到嘢，我就会去做。」